चैत १७, काठमाडौं । पत्रकार हत्या, आक्रमण तथा सञ्चारगृहमा भएको आगजनी तथा तोडफोड विरुद्ध नेपाल पत्रकार महासंघ आन्दोलनमा उत्रिएको छ ।

चैत १६ गते महासंघले आफ्नो ७०औं स्थापना दिवसको अवसरमा विभिन्न कार्यक्रम तय गरिरहदा बद्लिएको परिस्थितिसंगै महासंघ आन्दोलनमा जान बाध्य भएको हो । शनिबार बसेको नेपाल पत्रकार महासंघ केन्द्रीय समितिको आकस्मिक बैठकले सञ्चारक्षेत्रमा भएको घटनाको विरोधमा आन्दोलनका कार्यक्रम तय गरेको छ ।

बैठकले क्षति पु¥याइएका सञ्चारगृहको अनुगमन गर्ने, घाइते सञ्चारकर्मी र सञ्चार सामग्रीको विवरण संकलन गर्ने, आइतबार कार्यस्थलमा कालोपट्टी बाँधेर काम गर्न सबै सञ्चारकर्मीलाई आह्वान गर्ने, सोमबार केन्द्रीय समिति, प्रदेश समिति र शाखामार्फत नेपाल सरकारलाई ज्ञापनपत्र बुझाउने र मंगलबार सरोकारवाला संगठनहरूसँग छलफल गर्ने निर्णय गरेको छ ।  
मारिएका पत्रकार सुरेश रजक सम्बद्ध सञ्चारगृह, उनको परिवारसँग छलफल गरी प्रतिवेदन तयार पार्न उपाध्यक्ष उमिदप्रसाद बागचन्दको नेतृत्वमा सचिवहरू रमेश खतिवडा, सोनी शर्मा, प्रकाश धौलाकोटी र वैकुण्ठराज पराजुली संलग्न रहेको समिति गठन गरिएको छ ।  

प्रेसमाथि भएको आक्रमणको विरोधमा आज आइतबार कार्यक्षेत्रमा खटिएका पत्रकारले तथा सञ्चारकर्मीले कालोपट्टि बाँधेर काम गरेका छन् भने महासंघका शाखाहरुले शोक सभामार्फत घटनाको विरोध जनाएका छन् । शनिबार महासंघले माइतीघरमा विरोध सभा गरेको थियो । विरोध सभालाई विभिन्न सञ्चारसंवद्ध संघसंगठन, पत्रकार र नागरिक समाजका प्रतिनिधिहरुले ऐक्यवद्धता जनाएका थिए।

शुक्रबार तीनकुने क्षेत्रमा राजावादी समर्थित अराजक भिडले गरेको आगजनीमा परी जलेर एभिन्युजका फोटो पत्रकार सुरेश रजकको मृत्यु भएको थियो । उक्त भिडले तीनकुनेस्थित कान्तिपुर टेलिभिजनको कार्यालयमा ढुंगामुडा गर्नुका साथै अन्नपूर्ण मिडिया दैनिकको कार्यालय तोडफोड गर्दै आगजनी गरेका थिए भने हिमालय टेलिभिजनको सवारी साधन तोडफोड गरेका थिए। आन्दोलनका थप कार्यक्रम अवस्थाको विश्लेषणपछि तय गरिने महासचिव रामप्रसाद दाहालले जानकारी दिनुभयो ।