मिति : २०८१/१२/१८

नेपाल पत्रकार महासंघ काठमाडौं शाखाका सदस्य वरिष्ठ पत्रकार कमल कोइरालाको उपचारको क्रममा निधन भएको दुःखद् खबरले नेपाल पत्रकार महासंघ स्तब्ध भएको छ । ८७ वर्षीय कोइरालाको चैत्र १७ गते आइतबार राति काठमाडौंको सिनामंगलस्थित केएमसी अस्पतालमा निधन भएको हो ।

लामो समयदेखि पत्रकारिता क्षेत्रमा सक्रिय रहनु भएका कोइरालाले दृष्टि र रोडम्याप साप्ताहिकमा प्रधानसम्पादको जिम्मेवारीमा रहेर काम गर्नुभएको थियो । पछिल्लो समय साँघु र जनआस्था साप्ताहिकलगायतका पत्रिकामा स्तभकारका रुपमा क्रियाशील कोइराला पत्रकारितासँगै लेखकका रुपमा पनि परिचित हुनुहुन्थ्यो । उहाँको निधनले नेपाली पत्रकारिता जगतले एक जना सिद्धान्तनिष्ठ, अनुभवी र निर्भीक पत्रकारलाई गुमाएको छ ।

नेपाल पत्रकार महासंघ स्वर्गीय कोइरालाप्रति भावपूर्ण श्रद्धाञ्जली अर्पण गर्दै दिवंगत आत्माको चिरशान्तिको कामना गर्दछ । साथै, शोकको यस घडीमा शोकसन्तप्त परिवारजनमा धैर्यधारण गर्ने शक्ति प्राप्त होस भन्ने कामनासहित गहिरो समवेदना प्रकट गर्दछ ।

रामप्रसाद दाहाल

महासचिव