“राष्ट्रिय शिक्षा पत्रकारिता पुरस्कार –२०७५” तथा “लैङ्गिक समानता पत्रकारिता पुरस्कार” एक कार्यक्रमका बिच आज नेपाल पत्रकार महासंघको सभाहलमा वितरण गरिएको छ । 
‘राष्ट्रिय शिक्षा पत्रकारिता पुरस्कार–२०७५’ नागरिक दैनिक काठमाडौंमा कार्यरत पत्रकार रुबी रौनियारलाई प्रदान गरिएको छ । नेपाल पत्रकार महासंघ र शिक्षा मन्त्रालय, शिक्षा तथा मानव स्रोत विकास केन्द्रद्वारा संयुक्तरुपमा प्रदान गरिने रु. ५१ हजार राशीको पुरस्कार रौनियारलाई प्रदान गरिएको हो । सात प्रदेश र उपत्यकालाई १ प्रदेश मानी ८ प्रदेशबाट १÷१ जनालाई प्रदान गरिने रु २० हजार राशीको ‘प्रादेशिक शिक्षा पत्रकारिता पुरस्कार–२०७५’ प्रदेश नं १ बाट सुजन तिम्सिना ( इलाम), २ बाट सन्तोष सिंह (जनकपुर), ३ बाट सरिता श्रेष्ठ (धादिङ), गण्डकी प्रदेशबाट कमल खत्री (म्याग्दी), प्रदेश ५ बाट प्रेमनारायण आचार्य (अर्घाखाँची), कर्णाली प्रदेशबाट गोविन्द केसी (दैलेख), सुदूरपश्चिम प्रदेशबाट मोहन विष्ट (कञ्चनपुर) र उपत्यकाबाट लक्ष्मी पौडेल (काठमाडौं)लाई  गरिएको प्रदान छ । 

यसैगरी ७ प्रदेश र उपत्यकालाई १ प्रदेश मानी ८ प्रदेशबाट २÷२ जनालाई प्रदान गरिने रु १५ हजार राशीको प्रादेशिक शिक्षा पत्रकारिता प्रोत्साहन पुरस्कारबाट प्रदेश नं. १ बाट रोहित राई (सुनसरी) र सुशीला पाठक (मोरङ), प्रदेश नं. २ बाट बृजलाल प्रसाद पासवान (पर्सा) र सुनिल ठाकुर (सर्लाही), प्रदेश नं. ३ बाट शरद अधिकारी (काठमाडौं) र सविता श्रेष्ठ ( चितवन), गण्डकी प्रदेशबाट रोशन तिवारी (पर्वत) र शान्ता कमली (लमजुङ ), प्रदेश नं. ५ बाट विकास बन्जाडे (कपिलवस्तु) र भगवती पाण्डे (रुपन्देही), कर्णाली प्रदेशबाट विष्णुप्रसाद न्यौपाने (कालीकोट) र हरि गौतम (रुकुम), सुदूरपश्चिम प्रदेशबाट शैलेन्द्र रोकाय (बझाङ ) र भूमिराज जोशी (बझाङ) तथा उपत्यकाबाट राजन रुचाल (ललितपुर) र प्रशान्त वली ( काठमाडौं)लाई पुरस्कृत गरिएको छ ।
 त्यसैगरी संस्थागतमा एफएमतर्फ २० हजार राशीको शिक्षा पत्रकारिता पुरस्कार प्रदेश नं. १ बाट तमोर एफएम (ताप्लेजुङ), प्रदेश नं. २ बाट रेडियो अपन मिथिला (महोत्तरी), प्रदेश नं. ३ बाट रेडियो सन्देश (मकवानपुर), गण्डकी प्रदेशबाट ह्याप्पी एफएम (नवलपुर), प्रदेश नं. ५ बाट रेडियो मदनपोखरा (पाल्पा), कर्णाली प्रदेशबाट रेडियो शारदा (सल्यान), सुदूरपश्चिमबाट रेडियो जनप्रिय (अछाम) र उपत्यकाबाट क्यापिटल एफएम (काठमाडौं)लाई पुरस्कृत गरिएको हो । संस्थागततर्फ नै छापाबाट शिक्षालय मासिक (ललितपुर), अनलाइनबाट सेतोपाटी डटकम र टेलिभिजनबाट जनता टिभीलाई २५ हजार राशीको शिक्षा पत्रकारिता पुरस्कार २०७५ प्रदान गरिएको हो  ।  

त्यसैगरि नेपाल पत्रकार महासंघ र मदरल्याण्ड नेपालको सहकार्यमा प्रदान गर्दै आएको “लैंङ्गिक समानता पत्रकारिता पुरस्कार” बाट यस बर्ष तीनजना पत्रकारलाई पुरस्कृत गरिएको छ । 
पुरस्कृत हुने पत्रकारहरुमा सुजित कुमार झा, जनकपुर (एभिन्यूज टिभी), तिलसरा विक, हुम्ला (कर्णाली एफएम) र भवानी भट्ट महेन्द्रनगर (कान्तिपुर दैनिक) रहनुभएको छ ।
लैङ्गिक समानता हासिल गर्न समाजलाई अभिप्रेरणा गर्ने, समतामूलक समाज निर्माणमा भूमिका खेल्दै पैरवीयुक्त, खोजमुलक र प्रभावशाली समाचार र आलेख प्रकाशन÷प्रसारण गरी पत्रकारिता गर्ने मध्येबाट उहाँहरु तीन जना पत्रकारलाई पुरस्कृत गरिएको हो ।  

पुरस्कृत पत्रकारलाई ४० हजार नगद तथा सम्मान–पत्र सहित सम्मान गरिएको छ । 
कार्यक्रमलाई सम्बोधन गर्दै शिक्षा, विज्ञान तथा प्रविधि मन्त्री गिरिराजमणी पोखरेलले  पेशागत दक्षता र राष्ट्रप्रतिको प्रतिवद्धतामा समर्पित भई पत्रकारिता गर्न आवश्यक रहेको बताउनुभयो । उहाँले विगतमा आफुले पनि पत्रकारिता गरेको स्मरण गर्दै पुरस्कारले पत्रकारलाई धेरै आड भरोसा दिने बताउनुभयो । 
नेपाल पत्रकार महासंघका अध्यक्ष गोविन्द आचार्यले शिक्षा पत्रकारिता पुरस्कार मार्फत धेरै पत्रकारहरु पुरस्कृत गरिएको भएतापनि मूल्याङ्कनका आधारमा दक्ष पत्रकारहरुलाई पुरस्कृत गरिएको बताउनुभयो । 

शिक्षा तथा मानव स्रोत विकास केन्द्रका निर्देशक बाबुराम पौडेलले पुरस्कृत पत्रकारलाई बधाई दिदै आगामि दिनमा पत्रकारका कलमहरु निरन्तर चलुन् भन्दै शुभकामना दिनुभयो ।  
मदरल्याण्ड नेपालका अध्यक्ष अनिल पाण्डेले अमेरिकामा रहेर पनि नेपालको हितमा केही गरौं भन्ने मनसायले द्वन्द्वकालदेखि नै आफ्नो संस्था देशका लागिपरेको बताउनुभयो । उहाँले आफुपनि विगतमा पत्रकारिता गरेको तथा तथा पत्रकारिताप्रति रुचि रहेका कारण थोरै भएपनि पत्रकारका लागि केही सहयोग पुगोस भनेर पुरस्कारको स्थापना गरिएको बताउनुभयो ।
पुरस्कार छनोट समितिका संयोजक तथा महासंघका महासचिव रमेश विष्टले धेरै निवेदनका बिच उत्कृष्ट आवेदकलाई पुरस्कृत गरिएको बताउनुभयो । उहाँले आगामि दिनमा पुरस्कृत पत्रकारहरुबाट पत्रकारिता क्षेत्रमा थप जिम्मेवार तथा सशक्त हुने आशा राखेको बताउनु भयो । 

कार्यक्रममा शिक्षा पत्रकारिता पुरस्कारबाट पुरस्कृत पत्रकार रूबी राैनियार तथा “लैङ्गिक समानता पत्रकारिता पुरस्कारबाट पुरस्कृत पत्रकार सुजित कुमार झाले पुरस्कारले पेशाप्रति थप जिम्मेवार बनाएकाे धारणा राख्नुभयाे ।